Gal 3 | ASO | STEP | Agae, Galatia aleve lingine nene Izesu' Kilisito' lohoto' zalo' hiline' monovomu' nene do lanosa lo soto' ogo lo-lengemekunivo lingine gilani' nene mo vetinedunu' ningani' giline' nenako lingine negi ne'mine hizi Mose' lou' gamazi'mi gesi mingu' vilisa nani' nene zaho gatine hizo lengele'mize gopo ogavosa ne'mine nave.

Galatians 3

Lihimete Nomine' Minaa' Noune' Nene O'moso'mi Lou' Gamazi Gele Daa' Noune' Ne'mo Nomive. Izesu'nimu' Gele Ele'vole' Oga' Noune' Ne'mo Ve Lo Paulo' Lo-ngimine'

1 Agae, Galatia aleve lingine nene Izesu' Kilisito' lohoto' zalo' hiline' monovomu' nene do lanosa lo soto' ogo lo-lengemekunivo lingine gilani' nene mo vetinedunu' ningani' giline' nenako lingine negi ne'mine hizi Mose' lou' gamazi'mi gesi mingu' vilisa nani' nene zaho gatine hizo lengele'mize gopo ogavosa ne'mine nave. 2 Ne'mine nani' nemu' nene lingine mene ma longo' o-lengedelouze. Gililo. Lingine O'moso'mi Sikalahu' di ti' ani' ma nene Mose' lou' gamazilo' e'meti minisa dani' nehe. Ne nomive. Lingine Izesu' Kilisito'nimu' gilisa ezemu' gili ele'vole' igi minani' ne'mo O'moso'mi Sikalahu' nene di ti' ani' ma neive. 3 Lingine gana' nene O'moso'mi Sikalahu' nene di ti' igi ei' amuzololo' minani' nene mo hulisa lingine lou' gamazi'mi gesi mingu' vo leli' amuzotelokovo' mino monovote mudise do lamine' olone li gilani' noline' nene mo negi gatine gehepeve gilani' ve. 4 Ido' lingine gomu' O'moso'mi Sikalahu' di ti' igi nizavo lengita ato ato' monovo vai' goloso soto' o lingimine' ma nene hazamu' nehe. E'e, hazamu' soto' o lingimine' nomive losa gele nouve. 5 Ido' lingine O'moso'mo Sikalahu' lehize-lengedo ele'vole' suno lengiku' do soto' oga' ine' ma nene lou' gamazilo' gili di gono di minangumu' ne'mine ine' nehe ido' Izesu' gamazi gili gili ele'vole' angumu' ne'mine ine' neve. 6 Mono' godolou' ti' li gizi nizani' ma neive:

Abalahamu' O'mosomu' gele ele'vole' ogavo nemu' O'moso'mo gelavo ve lisihe' lihime've nomine' lolo' ine'.
Ido' O'moso'mo Abalahamu'ni inite' o-dine' nesi ido' lengiku' ele'vole' suno do soto' oga' ine' nesi nene hamo' monovo angumu' do soto' o-lingidine' nenako Abalahamu' O'mosomu' gele ele'vole' ine' ne'mine igi lingine Izesu'nimu' gili ele'vole' igi minangumu' ve losa ele'vole' suno lengiku' nene do soto' oga' ine' ve.

7 Ido' Abalahamu' O'mosomu' gele ele'vole' ine' nemu' nene O'moso'mo ve lisihe' ve lo-dine'za lengi' gatine hizave nene ti' li li-lingimi nilisave: O'moso'mi evenele zuho nene Abalahamu' a'vopilemo' oko'ine lolovo huki huli Mose' lou' gamazi'mi gesi mingu' minavevo' nene O'moso'mi zuho nizave. Ne'mine li li-lingimi nilisaha a'mine mono' godolou' neine' gamazi Abalahamu' monovomu' luvoni' maloti' nene lingine ne'mine li ningi gililisave: Abalahamu' zuho gihile nene eze a'vopilemo' minave nene nizavoba asi evene' ma ingine eze emeni dameni've di ti' igi eze oga' idi'mine igi O'mosomu' gili ele'vole' iga' ave nene Abalahamu' zuho gihile nene nizave. 8 Ido' Abalahamu' a'vopilemo' minamani' evene' heta ato' ve inginesi O'mosomu' alinge' gili ele'vole' ikevo nemu' nene O'moso'mo lihime'ine hulo-ngedo do lisihe' o-ngedeline' nene mo gele mino aza O'moso'mo a'minemu' nene Abalahamu'ni gamazi lamine' ti' lo lo-imine' mono' godolou' ti' li gizi nizani' ma neive:

Geitati' no'nohoka nene evene' zuho ato ato' mukita do soto' o-ngedelesuve.
9 Nemu' nene Abalahamu' aza gele ele'vole' oga' ive mine do vo minine' ne'mine igi gili ele'vole' iga' nave ingine nene O'moso'mo Abalahamu'ni no'noho' ize-do a'mine'mine ogo engikisi no'noho' ize-ngedaa' neive. 10 Ido' mono' godolou' ti' li gizi nizani' ma neive:

Ve ma ingine a'mine lou' gamazi gizi nizani' muki' nene gili dii osu' li'mi vi minami
a'minguti' ma hitilizani' nene O'moso'mo mudise vi tolovo ilisave lo engikumu' usi' ize-ngedo lo huko lo-ngede neive.
Ido' ti' li gizi nizani' nenako ve ma ingine a'mine Mose' lo huko line' lou' gamazilo' nene gele dokunivo a'mine'mo do lu' izelihe li a'mido' e'metaa' ave nene O'moso'mo mudise vi tolovo ilisave lo usi' ize-ngedo lo huko line' gamazi'mi lulou' nene vi hilaa' nave. Nemu' nene lou' gamazi'mi gesi mingu' vaa' nave nene O'moso'mo no'noho' ize-ngedaa' neive li li-lingimani' nene mo lamineto' li-lingimamave. 11 Ee, ve ma gili ele'vole' igi minilizadi'mo O'moso'mi velelo' lihime'ine nomine' minilizave ingine hazavo' ele'vole' igi mini di vi minilizave li mono' godolou' gizi nizani' nenako nemu' nene Mose' lou' gamazilo' e'meto minelonidoti' O'moso'mi velelo' lihimete nomine' minelonido' nomine' nene mo soto' o neive. 12 Ne neiha lou' gamazi dokunivo ne'mo do lu' izeleseive laa' nave ingine nene O'mosomu' gele ele'vole' oga' monovolo' mini mili minisa'mani'za ingine mono' godolou' ti' li gizi nizani' gamazi'mi lulou' nene vi hilani' ve:

Lou' gamazi gili dalizave ingine lou' gamazi ngomo' naba' muki' nene gili di osu' lilizani' ne'mo nene
hazavo' ele'vole' igi mini di vi minilisave.
13 Ne neiha lou' gamazilo' nene ngelo gele do osu' lamolone' o neine' nenako ne'mo O'moso'mo mudise vi tolovo ilisave lo usi' izo lo huko lo-lidine' gamazi'mi lulou' nene vo hulune' ve. Ido' laza a'mingu' vo hulunidoti' Kilisito' aza eze oko'no nene hulo meni hizo do tine' molo-lidine' ma neive. Ido' do tine' molo-lidine' aka nene ne'mino neive. Mono' godolou' gamazi ma ti' li gizi nizani' ma neive:

Evene' zalo' ngibili badave nene O'moso'mo usi' ize-ngidive nizave.
Kilisito' nene leli' lihimetemu' lohoto' zalo' bili badikevo lelito' medelo O'moso'mo usi' ize-dive lolo' ogave. 14 Ido' Kilisito' ne'mine ine' nene ei' Izesu' Kilisitoda vo gi'mizekunivo Abalahamudati' no'noho' nene numudo' namado' ve lelita vo osu' lavo ezemu' gele ele'vole' ogo minekunivo ne'mo O'moso'mo Sikalahu've lemelove lo lo huko-lidine' nene mo ele'vole' ogavo daloningumu' ve losa ne'mine ine' ve.

Mose' Lou' Gamazi've Ne'mo O'moso'mo Abalahamu'ni Lo huko Lo-dine' Gamazi Nene Ivile' Amivo Idisesi Ha Ele'vole' Ogo Neive Lo Paulo' Aza Lou' Gamazi'mi Monovomu' Lo-ngimine'

15 Neze zuhokizo, evene' laza ogo molo oga' nouninguti' naza haza avazaha gamazi ma loloze. Gililo. Ve ma aza evene' mamu' gamazi ma lo huko-do a'mine gamazi nene amuzo molo minelive lo luhuvo gize molavo a'mine gamazi nene haza eveneliti gamazi neiha evene' malitesi mo keke' a'mine gamazi lo huko luhuvo gize molani' nene di hulisa ato' gamazi gohi ma imine' mili ma lamilisave. 16 Nemu' nene O'moso neve Abalahamu'ni inite' lamine' ma do soto' o-delesa gamazi lo huko lo-dine' nenako a'mine gamazi di hulisa ato' gamazi gohi ma imine' mili ma lamilisave. A'mine lo huko line' gamazi nene Abalahamu'nimukisi ido' a'vopilemokumukisi nene lo-ngidine' ve. Ido' a'mine lo-ngidingu' nene ga'vopilemo' mukikumu' noluve lamo ga'vopilemokumu' noluve line' nenako nemu' nene aza evene' mukikumu' lamo evene' hamokumukovo' line' gelave. Ido' a'mine a'vopilemo' hamo' nene Kilisito'nimu' line' ve. 17 Ido' O'moso'mo Abalahamu'nimu' lo huko lo-dine' gamazi nene di hulisa ato' gamazi gohi ma imine' mili ma lamilisave luvoni' nene nemu' noluve: O'moso'mo gozopo' nene a'mine lehize-ledeline' initekumu' nene Abalahamu'ni lo huko-davo neloti' alinge' kilisimasi fo hadeti teoti (430) ogo vavo Mose' gizine' lou' gamazi nene soto' ogo minine' ve. Ido' a'mine lou' gamazi nene alinge' soto' ine' nenako O'moso'mo gomu' Abalahamu'nimu' lo huko line' gamazi nene ivile' ogavo haza gamazi ma lolo' amoloseive. 18 Ee, lingine mo gili nizave. Laza nene ti' lo laa' noune: O'moso'mo salani molo-lidine' inite' lemeline' nene inite' ma okunivo lemelivoba O'moso aza ha lemelove lo lo huko-lidine' gamazi've nene do gihile izelove losa haza gidini lemeleseive laa' noune. Ido' lengi' gatine hizave nete ti' li laa' nave: O'moso'mo salani molo-lidine' inite' lemeline' nene haza gidini lemamoloseive. Asi laza Mose' lou' gamazilo' e'meto minekunivosavo' nene menite gidini ne'mine nene lemeleseive laa' nave. Ido' ingine ne'mine laa' nani' gamazi nene lamineto' likeve losa Mose' lou' gamazilo' e'meto minekunivosavo' nene O'moso'mo salani molo-lidine' inite' nene menite ne'mine lemaa' idiniko leli' laa' noune' gamazi nene gosoho' lune' gelavo O'moso'mo ha lemelove lo lo huko-lidine' gamazi've nene do gihile izelove lo lemelesa line' inite' nene haza gidini lemamidine. Ido' haza nene lemamidine'za O'moso'mo Abalahamu'ni emelove lo lo huko-dine' inite' imine' nene inite' mamu' emamo ha gemelove lo lo huko-dine' gamazi've nene do gihile izelove losa haza gidini imine' nenako nemu' nene O'moso aza lemelove lo lo huko salani molo-lidine' inite' lemeline' nene lou' gamazilo' e'meto minuningumu' lemelivoba asi lo huko-lidine' gamazi've nene do gihile izelove losavo' nene lemeleseive lo mo lamineto' gele none. Ido' nemu' nene mose' lou' gamazi ne'mo O'moso'mo gomu' lo huko line' gamazi nene ivile' amoloseive. 19 Ne'mino neivo ma Mose' lou' gamazi nene nanitekumu' do soto' o-lidine' neve li longo' ilisave. O'moso'mo a'mine lou' gamazi do soto' o-lidine' nene nemu' do soto' o-lidine' ve. Ado' lou' gamazi've avuto' oga' noune' monovote nene a'mine lou' gamazi ne'mo do soto' ogo lelebizelive losa do soto' o-lidine' ve. Ido' ne'minemu' do soto' o-ledosa a'mine lou' gamazi nene mudise minelive losa do soto' o-ledamo asi a'mine lou' gamazi mineline' nene aza gamazi lo huko-dive ado' Abalahamu' a'vopilemo' olihe amine' gameneukovo' minelive losa do soto' o-lidine' ve. Ido' asi've O'moso ne'mo a'mine lou' gamazi nene evene' leli' adeu' gehepeve lemamive. Evene' di ngimilo lo angelo' nene ngemavo di igi leli' goholuso' vete Mose'ni imikevo do limine' ve. 20 Ne'mine o neine'za ve mali'mo goholuso' ve lolo' ogo mineline' nene evene' hamokumukovo' minamoloseive. Evene' sitalitisi gamazi'ine do hamo' olosa mineleseive. Ido' a'mine evene' sita' ingine gamazi'ine di hamo' nasivo engikuti' mali'mo a'mine lasine' gamazi'nido' ma gele damiline' nene a'mine gamazi'ine li di hamo' asine' nene do'mozeleseive. A'mine'mine ogo O'moso'mo lou' gamazi do soto' o-ngidingu' ezesi gamazi li di hamo' ani' nene evene' nete gili damavo a'mine lou' gamazi nene do'mozave. Ne neiha Abalahamu'ni gamazi lo huko-dive O'moso aza nene evene' hamo' mino lo huko-lidine' nenako asi've ne'mo gamazi've nene do amuzo molavo ngelo ma do'mozamoloseive.

Lou' Gamazi'mi Monovomu' Paulo' Imine' Molo Lo-ngimine'

21 Ido' ne'mino neivo ma Mose' lou' gamazi ne'mo nene O'moso'mo gomu' lo huko-lidine' gamazi nene molo hite-do minevo' minevo' lemeni dameni dalone' aka ato' gohi do soto' o-lede neihe. O'ove. Mo keke' ne'mine ma amive. Leli' nene evene' lisihe' gehepeve lolo' o-ledo minevo' minevo' lemeni dameni do soto' o-ledelido' lisihe' o minine' lou' gamazi nene ma limidiniko a'mine lou' gamazi gele dunidoti' evene' lisihe' gehepeve lolo' unidine'za a'mine ne'mine olonido' do lisihe' o-ledeline' lou' gamazi ma nomive. Ido' nomine' nenako nemu' nene Mose' lou' gamazi ne'mo O'moso'mo minevo' minevo' lemeni dameni haza gidini lemelove lo gomu' lo huko-lidine' gamazi molo hite-do minevo' minevo' lemeni dameni dalone' aka ato' gohi ma do soto' o-ledamive lo noluvoni' ve. 22 Ee, a'mine lou' gamazi gele dunidoti' evene' lisihe' gehepeve lolo' unidine'za mono' godolou' nene evene' muki' lou' gamazi linge ma avuto' igi minisa lihime daa' monovo'mi galapuso ve nizave li gizi nizavo lou' gamazi neuti' lihimete nomine' mino minevo' minevo' lemeni dameni daa' aka've nene ma soto' amive. Ido' lou' gamaziuti' soto' amine' nene O'moso'mo Izesu' Kilisito'nimu' gili ele'vole' igi minilizangumu' ve lo a'mine haza lemelove lo lo huko line' inite' nene ezemu' gili ele'vole' ave ngemeleseive losa nene lou' gamaziuti' soto' amine' ve. Nemu' nene Mose' lou' gamazi've ne'mo nene O'moso'mo haza lemelove lo lo huko-lidine' gamazi'velo' nene ataize ne'mine lo-do molo hitelido' o neive lo lamolosune.

23 Ido' laza gele ele'vole' olone' akate do soto' o-ledelive Kilisito' nene olihe soto' amivosa laza nene lou' gamazi ne'mo galapuso gono lemo do minivo mino Kilisito'nimu' gele ele'vole' olone' akate soto' iline' nene soto' ilingumu' gizebo ogo minune. 24 Nemu' nene Kilisito'nimu' gele ele'vole' okunivo ne'movo' lihimete nomine' minelone losa lou' gamazi ne'mo Kilisito' alingumu' nene gizebo o-ledo lele'mize akalo' ogo minine' ve. 25 Ido' a'mine Kilisito' mo ogavo ezemu' mo gele ele'vole' ogosa laza nene lou' gamazi'mi gizebou' nene gohi ma minamune.

26 Ido' ne'mine luvoni' nene lingine mo Kilisitoda igi gi'mizi ezemu' gili ele'vole' igi minikevo ne'mo nene mukito' O'moso'mi izipahala zuho lili' igi nizani' nenako mo a'neemu' luvoni' ve. 27 Ee, laza mono' noso holo Kilisitoda gi'mizunive muki' nene Kilisito' emeni dameni've do otuhune' nenako ne'mo nene O'moso'mi izipahala zuho lolo' okune. 28 Lingine nene mo Kilisito' evenele hamo' zuho ne'mine lili' igi nizanako nemu' nene gomu' Zuda ve minani' nehe heta ato' ve nGiliki ve nevo'mine minani' nehe ido' evene' maliti goboni ve lili' igi minani' nehe ido' ne'mine ami haza minani' nolihe ido' vemoho' minani' nehe vene' minani' nolihe evene' atoli'mine atoli'mine minani' monovotine nene idi'ne mo osu' lave. 29 Ido' Kilisito' evenele zuho nilizani' nene Abalahamu' zuho gihile mini O'moso'mo eze zuho lemelove lo lo huko salani molani' inite' nene dalisave.